رواية البنت السعودية الي دخلت مدرسة اولاد

في اخر السهره....
فجر رابطه راسها من الصداع: والله هالبزارين هبلوا فيني...
ريم: واحد قال لك صيري قطوه وكل سنه واحد...
فجر: واللي يرحم والديك اسكتي...ليه هو بيكفي..فيصل يقول يبي يكثر نسله...
العنود: على حسابك يا الغبيه...
عبير: متى بتولدين...؟
فجر: والله ما ادري...بس قريب وتسمعون برائد طلع للدنيا...
نوف: الله يسهل على الجميع....
رغد: عاد انتي بسم الله عليك اللي يشوفك بالشهر الا ول مو السادس...
نوف: نواف يقول اشك انك حامل وان هذا كرش...لانه ما كبر...
البنات ماتوا ضحك...
العنود: مافي مثل عبير يومها حامل...والله توقعت بتجيب دب مو طفل...
عبير: انقعلي بس...تصدقين عاد..طلال دايما يهزئني اذا قربت منه..يقول ابعدي في بينا حواجز...
ريم: احسن تستاهلين..
رغد: مافي مثلي بسم الله علي حل وسط....
العنود: مسكينه...اللي يشوفك..يقول كرشها اكبر منها..
رغد: مسكينه هذي انتي...
شجون: وش تتوقعون كرشتي...
فجر: اتوقع ولاده على طول بدون حمل...
والكل فقع ضحك..
مها: وانا؟؟
العنود: انتي بتولدين واحد والثاني مجانا ههههههههههه..
والكل مات ضحك...
رغد: خلاص خلاص بطني....ترى بولد عليكم الحين...
ريم: عاد الدكتوره ريم بتولدك..
العنود: كان الولد هج ورجع كرشة امه ارحم له...
&&&&&&&&&&&&&&&&&&&&
بعد اسبوع على الاحداث....
ام ماجد: وليد يمه..الى متى وانت على هالحال..
وليد: وش فيني؟؟؟
ام ماجد: ابيك تتزوج واشوف عيالك....
وليد: انتي خلصي موضوع ماجد بعدين انا...
ام ماجد: ماجد خالص ما بقى الا العرس...وانت خلني ادور لك بنت الحلال..
وليد مل من هالسالفه كل يوم امه تفاتحه بالموضوع: خلاص سوي اللي تبينه يمه...
ام ماجد: ابشر بالبنت اللي تقول للقمر ابعد وتجلس مكانه...
وليد: هذي باربي مو بنت..
ام ماجد: وتشوف وتقول امي ما قالت...
وليد: نشوف..
وطلع من البيت...
وليد: صدق ليش ما اتزوج واعيش حياتي...على الاقل في احد يهتم فيني..ومو لازم حب وخرابيط...
&&&&&&&&&&&&&&&&&&&&
بعد شهر......بكره زواج ريم وسليمان...زواج الحب العظيم...والعشق الكبير...
ريم مبسوطه: بكره انا وسلوم مع بعض ماني مصدقه...
رغد: بسم الله عليك..انا اتذكر يوم زواجي طقتني ام اركب انتافض وانتي ما شالله عليك..ترقصين وتستهبلين...
ريم: خايفه ومتوتره...بس بدون مبالغه يعني عادي...
رغد: الله يتمم عليك..
اتصلت العنود..
العنود: هلا ببنت عمي اللي بكره بتتزوج وتخليني...
ريم: عنوده تكفين لا تضيقين صدري...
العنود: لا والله مبسوطه لك..وبعدين بكره بفلها مع العجايز بدونك...
ريم خنقتها العبره: والله كانت ايام حلوه...
العنود: تصدقين العجايز حفظوني من كثر الزوجات وعرفوا اني نصابه...بس بكره بدور غيرهم من اهل سليمان..
ريم: خلي حمولتي على جنب..
العنود: سليمان وقلنا معليش..حتى اهله ما نتكلم فيهم..
ريم: هذولي من ريحة الغالي...
العنود: الله يوفقك بس..
ريم: امين...
&&&&&&&&&&&&&&&&&&&
اليوم زواج ريم وسليمان المنتظر...الكل يستنى هالزواج الاسطوري...كان مجهز بأفخم التجهيزات..
كان كل شي على شكل عصري قديم..كأنه ايام الروم القدماء..الكراسي غريبه الشكل بزخارفها..وطاولتها بعد غريبه بنقوشها..الجدران كانت الوانها غريبه والروسومات اللي عليها اغرب...
الكوشه وكأنها كرسي ملك الروم من ناحية الحجم والنقوش والزخارف..كل شي يدل على ذاك العصر..ايام الروم..
البنات اتبعوا نفس الاسلوب..فسانتيهم موديل الستينات مع التسريحات..والعروس نفس الشي...
ريم لابسه فستانها الا بيض الكبير..اكمام طويله..ومن عند الكتف كان منتفخ شوي..وبعدين فتحتة الصدر دائريه ومخصر على جسمها بعدين يكبر بالمررره..صحيح غريب لكنه روعه تحفه فنيه...وكأنها اميرات ذاك العصر..ولابسه جونتي دانتيل..ومسويه شعرها "ويف" يناسب ذاك العصر.. والطرحه حقتها نفس الشي من الدانتيل ونازله على وجهها لحد رقبتها..
رغد: بسم الله عليك الرحمن الرحيم...صوره وربي كأنك لوحه لفنان كبير..يمكن اللي راسمك بيكاسوا..
ريم ابتسمت: تسلمين..حتى انتي يا ام كرش...
رغد: والله ضايق صدري..كان ودي البس فستان سنع..
ريم: تهبلين بكل حالاتك..
وجاوا البنات وسلموا عليها وجلسوا عندها...
العنود: رويم..حسبي الله على بليسك غطيتي علينا...
ريم: انا العروس لازم اكون حلوه..
عبير: انتي احلى عروس..
نوف: بسم الله عليك...
شجون: بنت خالتي..حطيني جنبك عشان يقولون تقرب لها...
ريم رفعت خشمها: يا ريبه يحبون يتلزقون في الحلوين..ترى انا ما اعطي احد وجه..
الهنوف: ترى هذي تصدق بسرعه..هيه تراني احلى منك...
ريم: روحي هناك تكفين..
&&&&&&&&&&&&&&&&&&&
عند الرجال...
سليمان: اقول لك رجولي ما تشيلني ادخل عند الحريم...
تركي: والها النكبه..خلك رجال..تراها خمس دقايق وتطلع...
سليمان: ولو خايف..
تركي: كل الزوجات تدخل وتترقص وش معنى اليوم...
سليمان: اليوم انا معرس وابتزوج ريم قلبي...
مشاري: وش فيه النسيب؟
تركي ينعم صوته: خاااايف..
مشاري: ترى ريم اختي ما خافت كثرك امس ترقص وتستهبل وتطاق العالم حتى ولدي ما سلم منها...
سليمان تفشل: احم...اقول متى الزفه...
&&&&&&&&&&&&&&&&&&
جاء وقت الزفه..ريم جاهزه ومستعده..اخذت نفس وفتحوا لها البوابه...تحركت على موسيقى بعد من ذاك العصر..موسيقى صاخبه وفيها دقة رعب..نزلت على نغمتها والعيون عليها..بنت غريبه بفستانها وعجيبه بمكياجها..جذابه بجمالها..وساحره كلها على بعضها..واخير ووصلت للكرسي الفخم وصدق حست نفسها ملكه او اميرة زمانها...
دخل سليمان مناقض جدا لكل شي ..دخل بالزي السعودي النجدي مع البشت..وابو مشاري ومشاري مشعل ومحمد معاهم سيوف ..
كانت اغنيه الزفه العرضه السعوديه النجديه...
جلس سليمان جنبها وهو ينتفض..مسك ايدها وباسها مع جبينها..غمض عيونه..حس انه ما زال يحلم وانه اذا فتح عيونه بيختفي كل هذا..
ريم: الله يبارك فيك..
سليمان فتح عينه...طالع ريم...يعني انا في واقع مو في حلم..
سليمان: ريم....اليوم بس فرحتي كملت...
ريم نزلت عيونها : وانا بعد...
لفوا يطالعون الرجال كيف يعرضون بالسيف...
حضارتين منتاقضه كل النتاقض بس في نفس الوقت متجانسه..
بعدها طلعوا الرجال وبدوا البنات يردحون ويرقصون ويستهبلون...
وطلعوا المعاريس وصورا في غرفه مخصصه للتصوير...وعلى طول توجهوا للمطار راحيين لاسبانيا وتحديدا في سيدني....
&&&&&&&&&&&&&

وليد خطبت له ام ماجد بنت مثل فقلة القمر على ما يقولون..كانت مو حلوه بس الا الحلا كله...الكل يتكلم عن جمالها الرباني..ودلعها الطبيعي وفي نفس الوقت بعيده عن الغرور ومتواضعه...وليد ما طلب يشوفها ولا مره..لا في الخطبه ولا في الملكه ولا اخذ رقمها ولا كلمها ابد...اللي يعرفه ان اسمها ملاك اسم على مسمى...
يوم زواج وليد الكل فرحان ومبسوط اولهم رغد اكثر وحده فرحانه...راح وليد مع زوجته للفندق..حتى الان ما بعد شافها...
ملاك جالسه في صالة السويت مستحيه بفستانها...
وليد ولا عبرها دخل الغرفه وبدل ولبس البيجامه حرير..وجلس في الصاله..وطلب عشا لهم وشغل التلفزيون...
ملاك انصدمت منه..ما كلمها ولا عبرها حتى..
ملاك وقفت: انا رايحه ابدل...
وليد لف ببرود عليها ورجع يطالع اتلفزيون: خذي راحتك..
دخلت ملاك غرفتها وهي خانقها العبره...بس عدتها لسه عروس بدلت ملابسها ولبست فستان ناعم وروعه..مكون من لونين اللؤلؤي والذهبي.. وعدلت تسريحتها بسطيه..ضبطت شكلها وطلعت له...تبيه يطالعها ما شافها لحد الان..
توقعت اذا طلعت بيطالعها لكنها حصلت العكس تحطمت وجلست جنبه..
مرت لحظات صمت بينهم..بعدين وليد قطع هالصمت لف عليها بيتكلم ..الكلام وقف على لسانه..طالع اللي جنبه هذي بشر مستحيل..هذي ملاك...لا جد اسم على مسمى..صار يطالعها ويرمش بعيونه..يبي يستوعب الحلا كله...
ملاك استحت من نظارته: احم...وليد..
وليد صحى ولف وجه عنها: هلا..
ملاك تبي تسولف قالت يمكن خجول او ما يعرف يسولف: مين خواتك...ما عرفتهم..
وليد: بكره ان شالله تعرفينهم..
ملاك: طيب تكلم عنهم..
وليم تنرفز يعني غصب يتكلم صرخ: خلاص بكره تتعرفين عليهم..
ملاك بلعت ريقها ..هذا وال يوم وكذا يعاملها..خنقتها العبره...
وليد رحمها بس ما بين هذا الشعور: معليش ما قدرت اتحكم في اعصابي...
ملاك: لا عادي..
وليد يبي يلطف الجو: الحين العشا بيجي اكيد جوعانه...
ملاك سكتت...جاء العشا وتعشوا وناموا وما كان في بينهم أي حوار يذكر...
بعد ايام....في بيت ابو ماجد..
ملاك: ممكن تكلمني...
وليد يضبط نفسه قدام المرايه: ماني فاضي لك..ما تشوفيني ابطلع...
ملاك: طيب ليش تعامليني كذا...
وليد لف عليها وببرود: اجل وشلون تبيني اعاملك..
ملاك: يا حبيبي خف علي شوي..لا تصير جاف...
وليد عناد: انا كذا ..وطبعي كذا...تحمليني..."وطلع"..
ملاك: والله ماهي عيشه.."وصارت تبكي"
بأخر الليل على وجه الفجر....
رجع وليد..دخل غرفته حصل ملاك منسدحه وتبكي...
وليد: يا لليل ...الحين وش فيك تبكين...
ملاك ما ردت عليه...
وليد: والله حره...خلك مثل ما انتي لا تتكلمين...
ملاك عصبت: انت من ايش مخلوق ..من حديد..ما تحس..تراني بشر مو جدار...
وليد: تصدقين توني ادري...اقول لا تقعدين تعورين راسي ترى خلقه مصدع...اخمدي احسن لك..
ملاك قامت بتطلع من الغرفه..
وليد بحزم: على وين؟؟؟
ملاك خافت: ابطلع...
وليد بقسوه: ارجعي مكانك احسن لك...تبين تفضحينا انتي...ملاك تعوذي من ابليس احسن لك...
ملاك خافت منه ورجعت لسريرها وهي تبكي بصمت...
&&&&&&&&&&&&&&&&&&&&
من بكره...
العصر طلعت ملاك من غرفتها..ونفسيتها تعبانه..ما تدري وش تسوي مع وليد...اللي ماهي عارفه كيف تراضيه..اوكيف تعامله..لا الطيب نفع معاه ولا القوه..وقررت انها تعرف السبب...
نزلت تحت شافت العنود تلعب في الاب توب وتضحك..
ملاك: هااااي...
العنود: هلا والله بمرت اخوي الجديده..
ملاك ابتسمت: لازم التعريف كامل...
العنود: عشان نفرق بينك وبين مرت ماجد اسيل...
ملاك: الا صدق وينها اسيل..
العنود بطفش: في بيت اهلها...
ملاك: وش فيك عليها..
العنود: شايفه نفسها ما ادري على ايش...ما تحب تجلس معانا..بس هين انا لها...
ملاك: لا يكون انا مثلها بعد...
العنود: لا يا قلبي انتي وين وهي وين...
ملاك ابتسمت: عاد اهم شي رضاك..
العنود رزت نفسها: احم احم...ادري...
ملاك بجديه: العنود..
العنود شالت عينها عن اللاب توب وطالعتها: هلا...
ملاك: ممكن اسألك سؤال صريح وتجاوبيني عليه..
العنود: اكيد...
ملاك: قولي والله اقول الصدق..بس عشان اتطمن...
العنود: ولا يهمك..والله..
ملاك وهي تلعب في ايديها متوتره: آآآآ أبسألك عن وليد...وليد وش طبعه يعني وش شخصيته....
العنود: وليد حبوب وطيوب..بس طبعه حاد..يعني ممكن ما تفهمينه على طول..
ملاك: طيب أمانه..بأمانه..هو كان يحب وحده من قبل لا يخطبني...
العنود طيرت عيونها..السؤال مره صعب وجوابه اصعب...صعب تقول لزوجه ان زوجك ما يحبك وما زال متعلق في حب قديم مقطوع الامل فيه..
ملاك: وش فيك سكتي..يعني افهم انه كان فيه..
العنود: والله ما ادري وش اقول لك يا ملاك...
ملاك: اوكي انا فهمت..بس انا اعرفها...
العنود بتردد: ايه...رغد بنت عمي...
ملاك انصدت::رغد.."سكتت شوي"....بس رغد متزوجه..
العنود: وليد حبها بس هي ما حبته..
ملاك دخلت في دوامه من الافكار..واستنتجت ان وليد كان حبه حب فاشل..والدليل زواج رغد من غيره وطريقة معاملته لها..
العنود: ملاك.....ملاك....
ملاك: هلا..
العنود: بليز ملاك ما تزعلين..وترى السالفه من زمان صايره...ووليد نسها خلاص...
ملاك ابتسمت مجامله: ادري..وليد يحبني..وهذا اللي يأكد لي...
العنود رجعت تطالع اللاب توب بس بالها بعيد..تفكر هل فعلا وليد يحب ملاك..ونسى رغد..

&&&&&&&&&&&&&&&&&&&&&
بالليل اجتمع الكل في بيت ابو مشاري..
وعند البنات بالتحديد..
رغد سلمت على ملاك: هلا والله وغلا..
ملاك تطالعها وسلمت عليها ببرود: هلا..
رغد استغربت برودها ..بس مشتها..
جلسوا البنات وبدت السوالف والضحكات تعلى...
ملاك تطالع رغد..:"" رغد حلوه وتاخذ العقل..وطيبه وحبوبه..بس اتوقع اني احلى منها..يعني ما فيها زود عني...يمكن بس عيونها العسليه جننته..او غمزاتها اللي ما تبان الا لما تضحك..بس اتوقع ان كل هذا مو كافي انه يتعلق فيها وهي متزوجه...""
رغد: ملاك....وش رايك انتي...
ملاك: هاه..
رغد:لا البنت مو معانا..كنت اقول لك..من احلى بنتي رهف ولا بنت عبوره ريوف...
ملاك طالتعهم : لا كلهم يهبلون..
ريم: لالا عاد بنت اختي احلى..طالعه على امها..
ملاك رجعت تطالع رغد..رغد حست فيها وقربت منها وهمست لها...
رغد بحنان: ملاك حبيبتي فيك شي..تعبانه او تشكين من شي..
ملاك: لالا ما فيني شي...
رغد: احب اقول لك يا بعد عمري اذا احتجتي تتكلمين لاحد او تفضفضين لاحد..تراني موجوده..واحنا بنات ونفهم على بعض ونقدر نساعد بعض...
ملاك وهي رافعه حاجب: انتي متأكده انك تقدرين تساعديني..
رغد تحمست: انتي جربيني وشوفي..
ملاك: انا مشكلتي.....مع.....مع وليد..
رغد استغربت: وليد....!!!
ملاك: ايوه وليد..
رغد والتعجب مالي عيونها: وش فيه؟؟؟
ملاك: والله ماهو لمي..ولا يحبني ولا حتى ما يطالعني من ارضي..ولا يتكلم معاي مثل الناس..ولا يسولف معي مثل العرايس..ولا حسيت اني عروس من اول يوم تزوجته فيه...
رغد: معقوله...
ملاك: هذا اللي صار...
رغد: طيب انتي حاولتي تجذبينه...
ملاك: حاولت بس فشلت..
رغد: شوفي يا قلبي ..عشان تجذبين زوجك لازم تعرفين اللي يميل له ويحبه وتعالي له من ذاك الطريق..
ملاك عقدت حواجبها: يعني مثل ايش..؟
رغد: يعني وليد مثلا يحب الحرمه اللي تفهم عليه على طول..تغرقه بحبها وكرمها..واحساسها..وليد تراه حساس وشاعري..وانتي تعالي له من الناحيه هذي..
ملاك بخبث: مشا الله كل هذا عارفته عن وليد..
رغد ارتبكت بس ما بينت: ولد عمي وعايشه معه نص عمري اكيد بأفهم عليه...
ملاك ابتسمت لها: انا فهمت عليك..بحاول اسوي اللي قلتيه لي واشوف..مشكوره يا قلبي على النصيحه...صدقيني كنت محتاره وماني عارفه وش اسوي...
رغد ابتسمت: ولو يا ملاك..واذا احتجتي أي شي تذكري دايم ان اختك رغد موجوده..
ملاك: تسلمين..
عبير: وش تقولين لمرت اخوي..لا تخربينها...
رغد: اقول وين اسيل ما جات معاكم...
العنود رافعه خشمها ورزاه صدرها تقلد اسيل: واله انا رايحه بيت اهلي مسوين بارتي...
الكل ضحك عليها لانها عرفت تقلدها..
عبير: الله يعينك بس عليها..
العنود: والله ودي اقوم واكفخها بس اسكت والله عشان ماجد اخوي..
نوف: اجل نفس اللي عندي...ندى اخت نواف..
ريم: مازالت شايفه نفسها ام خشه مايله..
نوف: تغار مني بشكل مو طبيعي تقلدني في كل شي...تشتري نفس اللبس اللي البسه وتتبلى علي وتقول لي لا تقلديني....
فجر: الله يلوع كبدها الماسخه..
ريم: احقريها..
نوف: والله متحملتها..بس استناها تتزوج وافتك منها..
ريم:تكفين من اللي داعي عليه امه عشان ياخذها...
نوف: في هذي صدقتي..والمشكله تتشرط من زين الوجه..
العنود: بعد..والله حاله...
نوف: ما شفتوا شي...طلبات غريبه عجيبه وموصفات زوجها اغرب..يعني شروط تعجيزيه..
مها: لا بالله رحتي فيها...
نوف: الله يكون في عوني ويصبرني بس...
الكل: امين..
& &&&&&&&&&&&&&

رجع الكل على بيته وفي غرفة وليد بالتحديد..
ملاك وهي تمشط شعرها على التسريحه..: تصدق ياوليد ارتحت للبنات بالمره..
وليد وهو منسدح وساند ظهره على ظهر السرير: ايوه زين..
ملاك بقصد: وبصراحه ارتحت لبنت عمك رغد..
وليد وهو يشرب مويه بعد البندول شرق فيها: كح كح..ايوه رغد..
ملاك راحت وجلست جنبه: بصراحه هالبنت مره حبوبه..
وليد يصرف: ايه..ايه..يله ما ودك تنامين..
ملاك بدلع: من عيوني يا بعد عمري انت..
وقربت من وليد بالمره..ومسكت ايده وحطت راسها على صدره اللي بدون قميص..
ملاك: احس ان الناس تحسدني عليك...
وليد ارتبك من قربها..هو ما قد قرب منها...
وليد: لا...انا اللي تحسدني الناس عليك...
ملاك رفعت راسها تطالعه: وليد تحبني مثل ما انا احبك..
وليد بلع ريقه وسحب ايده: ايوه..يله نامي...ترى بكره وراي دوام..
وعطاها ظهره..
ملاك انسدحت وهي حاطه في بالها انها راح تنسيه رغد..وابو رغد بعد...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
اليوم اللي بعده..
رجع وليد من الدوام..تعبان وهلكان..دخل غرفته حصلها..متغيره..كل شي احمر...فرش السرير احمر..في كل مكان ورد احمر..الانوار حمراء..وريحة الورد ماليه المكان..طلت عليه ملاك بأبتسامه حلوه ومرحه: حبيبي انت جيت...
وليد ابتسم غصب عنه جمالها ما يرحم: ايوه جيت..
راحت ملاك واخذت شماغه منه وعلقته واخذت ثوبه وعلقتهم..
جلس وليد بيفسخ جزمته..جات ملاك وجلست عند رجوله وفسخت جزمته"الله يكرمكم.."

ملاك: كيف الشغل اليوم..
وليد ما استوعب حركتها:لا..تمام الحمد لله...
ملاك: اكيد يا قلبي تعبان يا بعدي والله..مجهزه لك حمام يحبه قلبك..
وسحبته من ايده..
ملاك: يله تروش وارتاح..عشان نتغدا انا وياك..
وليد سوى اللي قالته له ملاك بدون نقاش او حتى كلمه..
طلع وليد وهو ينشف شعره وجلس على الكرسي قبال التسريحه..جات ملاك واخذت المنشفه وصارت تنشف شعره..وصار شعره الاسود على وجهه ..ملاك تطالعه من المرايه: تصدق شكلك كذا يجنن...
وليد ابتسم لها: تسلمين عيونك الحلوه...
ملاك فرحت انه قال كلمتين على بعض: الله يسلمك..يله قوم خلينا نتغدا..ترى انا اللي مسويه الغدا بنفسي..
وليد مستغرب: صدق!!..تعرفين تطبخين..
ملاك: هو انا ما اعرف بس عشانك تعلمت ولما ضبطته مره..بأخليك تذوقه..
وليد تحمس لها: اوكيه..نشوف يا شيف ملاك..
ملاك قرصت خشمه: اكيد بيعجبك...
وليد نزل معاها وهو مبهور منها...اليوم وامس حركاتها غير...صايره جريئه بزياده..تسوي الاشياء اللي مفروض هو يسويها لها...
ملاك فتحت غرفة الطعام: تراااااا..وش رايك..
وليد يطالع طاولة الطعام اللي مليانه شموع حمرا..واكلات واصناف متنوعه..ومرتبه بشكل انيق..
وليد طالعها: مشا اله كل هذا انتي مسويته..
ملاك: ا نشا الله يعجبك..
وليد: اكيد بيعجبني..
ملاك حست انها بدت تحقق كم خطوه من هدفها: اوكيه الحين ذوق الاكل وعطيني رايك..
جلس وليد وجلست معاه ملاك..وحطت له من كل شي وحطته قدامه..اخذ وليد الشوكه وصار يذوق ويثني على كل طبق..وملاك الابتسامه ما فارقتها ابد..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بعد ايام...كانت حياة وليد كل يوم احلى الثاني..والفضل بعد الله يرجع لملاك..حس انه بدا يطلع من السواد والظلام اللي عايشه وماشي عليه من ثلاث سنين..من لما قرر يغير طريقة حياته..ملاك كل يوم تحببه فيها اكثر..من اهتمامها..من رعايتها..خوفها عليه..حرصها عليه..كل يوم شي جديد..كل يوم روح جديده...بدا يتغير معاها..مو كثير لكن احسن من اول بكثير..ملاك حست انها حققت نص هدفها لكن ما وصلت للنهايه..والنهايه انه يحبها حب حقيقي وينسى حبه الماضي....
&&&&&&&&&&&

نروح لماجد وزجته اسيل..ناخذ موقف من حياتهم اليوميه واللي دايم مثله يتكرر...
اسيل: بصراحه اهلك مره مو شي...
ماجد: وش تقصدين..
اسيل: هذي العنود..مره...مره أي شي...
ماجد وهو كاره حياته: اسيل ترى هذي اللي تتكلمين عنها اختي...
اسيل: ادري انها اختك..اعوذ بالله غثه...من تشوفني تحب تنرفزني تطلعني من طوري..
ماجد: العنود اكبر من كذا..
اسيل: يعني انا كذابه..
ماجد: ما قلت شي انا...
اسيل: احمد ربك اني متحمله العيشه مع اهلك..
ماجد: انسي اني اطلع من بيت ابوي...
اسيل: ليه...يا روح ماما..ما تقدر تفارقها...
ماجد: اسيل عدلي اسلوبك احسن لك..
اسيل اخذت عبايتها: اوكي لا تعصب انا طالعه...
ماجد: على وين؟؟؟
اسيل: بروح لوحده من صاحباتي عازمتني...
ماجد: ما فيه طلعه..
اسيل: مو بكيفك..
ماجد: اسيل ترى ان تعديتي الباب بخطوه ما تلومين الا نفسك..
اسيل: قلت لك مو على كيفك..
وطلعت..
لحقها ماجد ومسكها ولفها عليه وعطاها كف..افزع صمت الجدران...
اسيل مسكت خدها ودموعها في عيونها: تضربني..انا ابوي ما تجرا يضربني....
ماجد منفعل: عشان كذا ما تربيتي..واذا تبين تطلعين روحي بيت اهلك مره وحده...
اسيل: اوكيه..انا رايحه لبيت اهلي.."وقفت عند الدرج"..يا روح ماما...
ونزلت الدرج بسرعه..
ماجد خلاص تعب من هالمسلسل اللي كل يوم يعيد نفسه..كل يوم يتهاوشون على شي..وكل ما حاول يرضيها ما يعجبها شي..وانقلبت حياة ماجد الى جحيم مستمر..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
في مكان ثاني...
رغد لابسه وكاشخه ومتعدله..وتحط اللمسات الاخيره..
دخل تركي ..وطالعها..
تركي بأبتسامه: مشا الله وش هالكشخه والاناقه..وش عندك؟؟.. اكيد اليوم ذكرى زواجنا...ولا يوم ميلادك..
رغد مفتشله: ههه لا هذا ولا ذاك..
تركي بخبث: اجل كاشخه لي..يا حبي لك والله..
رغد ما تبي تفشله: ليه انا ما قلت لك اني بطلع..الهنوف عازمتني..
تركي بنفجر: بعد الهنوف...محد قال لك من قبل اني زوجك...يا اختي محد قال لك...اني مسؤل منك..كل يوم ناطه عندها وشوله...
رغد: بس بس لا تصارخ..وش فيك يا قلبي..انا بروح ازور امي وفي نفس الوقت اقعد عند الهنوف اوسع صدري...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
الهنوف في المطبخ وتصلح وتضبط..
دخل مشاري: الله....ريحة كيك..
الهوف بأبتسامه: ايوه كيك..
مشاري شاف الكيكه: يا قلبي يا هنوفه...من قال لك اني احب هالكيكه..
الهنوف ما تدري وش السالفه: ه ه ه
مشاري: ليه تعبتي نفسك عشاني ..بس اكيد لذيذه لانها كيكة هنوفة قلبي..
الهنوف: اكيد...بس......بس هذي مو...لك..
مشاري وجه صار احمرررررر: اكيد رغيد..
الهنوف خافت يعصب: مشاري لحظه..اصبر..خلني افهمك السالفه..
مشاري: رغد...رغد..خليها تجي ..بأذبحها وافتك منهااااااا للأبد..
الهنوف: مشاري وش فيك..خلاص ولا يهمك اصلح لك بكره احلى منها..
مشاري طلع وهو يتحلطم: انا بتصل على زوجها يضفها بعيد عنا..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&

في بيت ثاني وفي جو ثاني وعالم ثاني...
ريم: انا اقول لك الجوري..
سليمان: وانا اقول لك نوره على جدتي..
ريم: وانا وش علي من جدتك..حرام عليك من الجوري الى نوره..يا اخي حس شوي...
سليمان: حرام عليك كانت جدتي الله يرحمها تحبني..
ريم: الله يرحمها...بس اسمي بنتي نوره انسى...
سليمان: طيب خلي البنت على جنب افرضي..حملتي وجبتي ولد وش نسميه...
ريم: نسميه....امممممممم سطام..
سليمان: لالالا انا ما اوفقك ..بأسميه على عم ابوي دحيم..
ريم: شكلي ما راح احمل طول عمري..
سليمان: ليش؟؟
ريم: وش فيك انت وش فيك...ما عندك شي اسمه ذوق..ولا ما بعد تعرفت عليه..
سليمان: دحيم وش فيه..كان عم ابوي هذا..هو اللي سماني سليمان الله يرحمه..
ريم: سليمان حلو عنده ذوق..بس دحيم هذا وشلون اسمي ولدي عليه..يا اخي حس ولدي بيتعقد بسبة اسمه..
سليمان: طيب اوكيه خلي الولد على جنب..
ريم: اذا مو بنت ولا ولد وش بيطلع شي ثالث...
سليمان: صح نسيت...
ريم: ياربي هالرجال ما ادري وش اسوي فيه..وين خالتي انا بروح لخالتي ارحم لي..
"وقامت".....
سليمان: دحيم ...وش فيه دحيم حلو ولا ودلع بعد..خليني اروح اقنعها....
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بعد سنتين..
راح اتكلم عن كل بطل من ابطالنا..
فجر +فيصل...فجر جابت ولد وسمته رائد..وحياتهم كلها حب في حب..والناتج اكيد سعاده ابديه مع الاستقرار...
مشاري+ الهنوف..جابت الهنوف بعد فارس بنوته حلوه تشبه مشاري واسمها غدير نسبه من اسم رغد..وعايشين حياتهم تمام التمام..<<الله لايغير عليهم..
ماجد+اسيل...ماجد ما تحمل اكثر اسيل وحركاتها وارسل لها ورقة طلاقها..وامه تحن عليه يتزوج بس هو شايل الفكره من راسه...بس اكيد ام ماجد ما راح تخليه...
فواز+بدور....عايشين حياة طبيعيه ويتخللها الحب...وبدور جابت ولد وسمته ضاري...
طلال+عبير...عايشين حياتهم سمنه على عسل..مبسوطين بس عبير ما حملت..
رغد+تركي... مافي مثلهم عايشين الحب بالطول والعرض ورغد جابت مع رهف ولد وسمته عبد العزيز على ابوها..
نوف +نواف...ولدت نوف وجابت توم<<ما ادري وشلون جابتهم..
بنتين مثل القمر يهبلون على امهم..وسمت الاولى يارا والثانيه لارا...
شجون+زوجها مهند ...حملت شجون ومازالت دلوعه وما تغيرت عن اول..
مها+ زوجها راشد....مسكينه مها خايفه ان يكون فيها شي لانها لسه ما حملت وهذا الشي مسوي اضطراب في زواجها..
وليد+ملاك....وليد حب ملاك حب عظيم..حس معاها بمعنى الحياة الحقيقه..يعيش كل يوم معاها قصة حب جديده..ملاك قدرت توصل لهدفها بعد ما تعبت كثير مع وليد وكل هذا بفضل الله ثم بفضل رغد وفكرتها..قدرت ملاك تنسي وليد رغد عن طريق رغد نفسها""سبحان الله"..
ريم+سليمان...طيور الكناري او طيور الحب ..مازالوا هايمين في الحب وطايرين فيه وعايشين حياتهم على البساطه بدون مبالغه في أي شي..حياتهم حلوه وبسيطه بدون التعقيد اللي يخلي الحياة حجيم..ووحملت ريوم وجابت ولد وسمته اكيد دحيم لالا امزح سمته سطام...
العنود....فتحوا لها اعمامها شركه نسائيه فرع لشركتهم الاساس..وصارت العنود مديرة هالشركه..كرست حياتها لتثبت للكل انها قد المسؤليه..وصارت حياتها للشغل وللشركه...وفعلا اثبتت وجودها..وصارت تنافس شركات رجاليه لها صيتها..طبعا محد قدر يفتح قلبها مره ثانيه...بس الله العالم في المستقبل وش ممكن يصير..
مشعل +لين... اكيد حلم الطفوله لازم يتحقق والوعد اللي كان بينهم لازم يوفى..مشعل خطب لين بعد ما تخرجت من الثانويه على طول..والحين عايشين ايام الخطوبه مثل روميو وجولييت ..لين مبسوطه بالمره انها في النهايه من نصيب حبيبها منذ الصغر مشعل..ومشعل نفس الشي...
محمد...دخل العسكريه وصار ضابط كبير..وقرر انه يتزوج بس ما زال يبحث عن وحده تحبه حب كبير مثل حب لين لمشعل...
سعود...تزوج اخت نواف ندى..وقدر يغيرها مع فرق العمر اللي بينهم .. بس هذا ما شكل عائق في حياتهم...وتغيرت وكمل حياته والحين عنده ولد واحد...
فهد...كبر وصار رجال وبالنسبه لامه وابوه ماتغيروا..بس هو الوحيد اللي تغير وعاش حياته وسافر برى المملكه يكمل دراسته وياخذ شهاده ترفع راسه ويرجع دكتور لوطنه..
ابو الهنوف...من بعد رجعته الاخيره للرياض وخطبة الهنوف وزواجها صحاه من اللي كان فيه..وحن لعياله ولام اعياله..وقرر يعيد نفسه من اول وجديد عسى يقدر يلحق يعوضهم ربع اللي راح..ويقدر يرضي ضميره...
الامهات...مازالوا انفسهم ما تغيروا بس طلع لهم كم شيبه في روسهم ومازلت كلمتهم احنا لسه شباب..
الابوان.... زاد الشيب اكثر واكثر وما تغيروا هم نفسهم يبقون الشياب...
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&

النهايه....

THE END
الًــــنـــــهـــــــايـــــــة

اهيء اهيء
كنت أتأمل انو في نهاية أطول بس
خلللللصت

ههههخخخخخخ

مشكوره لتكملت القصه عن ريم

سلميلي عليها وقوليلها إنشاء الله تقوم بالسلامة

ان شاء الله من عيوني

الله يسلم عيونك

ان شاء الله

^&^

متى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وااو روووووعه الروايه جنااااااان يستهال 100 صفحه

لوكانت ردودكم كثيرة حصلة الرواية 1000 صفحة